Pag ulikid Caravan ni Mayor Joe III

SOURCE: Jose Espinosa III

Isa na naman ka madinalag-on nga Pag-ulikid Caravan ang aton nadala sa apat ka mga barangay sa syudad sang Iloilo. Ini ang sa Brgy. Mansaya kag Don Esteban sa distrito sang Lapuz kag Brgy. East Baluarte kag Katilingban sa distrito sang Molo, nga gintambongan sang masobra 16,000 ka mga benefisaryo halin sa 13 ka mga kabarangayan sang syudad nga kalapit sining apat ka barangay nga ginhiwatan. Gindala naton ang mga libre nga serbisyo sang city hall deretso mismo sa ila mga kabarangayan; libre nga medical, paggabot sang ngipon, pagpapaltak sa mga kabataan kag pagkapon sang mga kasapatan. May ara man libre nga mga ID's parehas sang Senior Citizens ID kag PWD ID, may instant man nga pagkay-o kag pagpahimo sang birth certificate halin sa registry office sang syudad. Libre nga mga wheelchair para sa aton mga pumuluyo nga naga kinahanglan kag mga sports equipments para sa aton mga kabataan kag madamo pa.

Ginakalipay ko gid nga i-anunsyo subong nga adlaw nga ang syudad sang Iloilo, finalist sa apat ka national nga awards; ini ang National Literacy Award (Validation Date: August 7), 2018 Seal of Good Local Governance (SGLG) (Validation Date: August 8), Galing Pook National Finalist (Validation Date: August 13-14) kag lastly ang Most-Child Friendly City in a Highly Ubranized City category (Validation Date: September 23-24). Ginapasalamatan tagid nga kita liwat nadala bilang finalist sang sini nga mga awards, kag ginapangayo ko gid ang tagsa tagsa ka kooperasyon sang tanan para sa aton nga kadalag-an.

Madinalag-on ang aton dowa ka international event nga ginhiwat diri sa syudad. Una, ang pagkadto sang mga amigo naton halin sa Quanzhou City sa China para sa opisyal nga pagpirma sang letter of intent para sa sisterhood agreement sa ila; ikadowa, amo ang paghiwat sang 11th Disaster Cluster Summit sa aton syudad nga gina organisa sang CityNet Ginapasidunggan ko gid ang aton CDRRMO, City Planning, PIO kag membro sang Iloilo City CDRRM Council sa isa ka madinalag-on kag matawhay nga paghiwat sini nga national summit sa aton syudad.

Ini tanan nga mga hilikoton kag programa sang syudad aton gid ginahatagan importansya kag prayoridad, kay nagapati gid ako nga wala sang pulos ang mga kadalag-an kag maayo nga mga hinimuan sang isa ka syudad kung ini wala naga-ulikid sa mga pumuluyo nga nagakinahanglan sang bulig. Gani, nagapasalig gid kami sa Iloilo City Government nga magapadayon ang pagdala namon sang Iloilo City Hall sa mga kabarangayan sang syudad. Ini tanan para gid sa inyo bangod kami may PAGPALANGGA kag PAG-ULIKID sa inyo tanan.

ARANGKA SYUDAD SANG ILOILO!